من فتره مش قليله و المجلس "الموقر" بدأ يمشي شمال مع البلد كلها حكومه و شعب لدرجة انه بقى بيخالف نفسه و يعمل عكس كلامه و عكس موقفه تجاه الثوره و ان كان كل حاجه بيعملها المجلس "الموقر" يقال انها من اجل مصلحة الوطن و محدش يقدر يفتح بؤه "---" ... يعني مثلا هنتكلم كده على كام نقطه هما الأهم "من وجهة نظري" :
2- قانون الطواريء اللي قامت الثوره عشانه و عشان متتشدش اشتباه و انت ماشي ف شارع بيتكوا المجلس "الموقر" يرجعه تانى و يقولك ده مقرر من 2010 لحد 2012 بأوامر من الرئيس المخلوع و تصديق من مجلس الشعب المنحل ده غير انهم لسه بيعملوا بدستور 71 اللي الدنيا كلها عرفت انه تم الغاء العمل بيه !!... عاوز تلغي قانون الطواريء اعمل مجلس شعب جديد يا حيلتها منك له ............. بس اكيد نرجع و نقول عشان نقضي ع البلطجيه الوحشين مش اكتير و مالوش دعوه بالمليونيات و الاعتصامات ... و من اجل مصلحة الوطن !!!
3- طب نعمل مجلس شعب ازاي يا عم المجلس "الموقر" و سيادتكم منزلين دواير انتخابيه ما يعلم بيها الا ربنا من شرقها لغربها و مش بتخدم الا اشخاص معينه او اشخاص منظمه او فلول وطني و اخوان منظمين جدا ......... بس بردو اكيد المجلس "الموقر" ادرى مني و منك ... الكلام ده كله لمصلحة الوطن !!!
4- هو ليه المحاكمات العسكريه للمدنيين و ليه لما فيه محاكمات عسكريه سريعه النظام المخلوع متحاكمش فيها ... مش على مقاسه ولا ..... خدمة لأمن و مصلحة الوطن ؟!!
5- طب بلاها طواريء و بلاها قانون انتخاب .... هو يوسف بطرس غالي وحشنا اوي كده ولا عمل فينا معروف نقوم نرد له الجميل و نرجع قانون الضريبه العقاريه بدايه من 2012 ؟؟!! ........ يعني انا لما ابقى وارث عقار ولا فيلا بمليون جنيه ميراث مش من فلوسي ادفع ضريبه عليها ليه ؟؟!! ............... اكيد المجلس "الموقر" ادرى مننا .. يمكن لم الفلوس أهم في الفتره الانتقاليه "الطويــــــله" الحاليه لمصلحة البلد .. قصدي الوطن !!!
6- طب لما بلد فيه قناة السويس و مترو الانفاق و جبل دهب و بترول و غاز طبيعي ده طبعا من غير سياحه و اثار مش هتكلم فيهم دلوقتى عشان لما بنجيب سيرة السياحه الاثار بتغدر بينا و تهرب بره "لوحدها" ... لما البلد فيها كل ده ... ليه فيه اعتصامات و خناقات و ناس بتطالب بحقوقها ؟؟ ... ليه الحكومه رايحه جايه توهم الناس ان الاقتصاد منيل و بينزل كل يوم 10 مرات عن اللي قبله ؟؟!! .................. تفتكروا ممكن تكون حركة تمويه من المجلس "الموقر الداهيه" لجهات خارجيه اجنبيه عشان تستمر في تمويل لمصالحها الخليجيه منها و الامريكيه ... يابن اللعيبه يا مجلس تسلم دماغك و يبارك لنا ف مصلحة الوطن !!!!
7- البلد مليانه خير و الحراميه المحبوسين اقل بكتير من بره ... بس ده ميمنعش ان الثورة قامت عشان العداله الاجتماعيه ... عشان عم احمد البواب يكون قاعد بيتعشى و معالي قيادة المجلس بردو بيتعشى ... عشان التعليم المجاني يبقى اسم على مسمى ... عشان الاكل ميتجابش من الزباله ... عشان بتوع المناديل و الولاعات ميبقوش اكتر من الناس ف الشارع ...عشان حرامية الموبايلات و العربيات و المتحرشين يبقوا ف السجون ... عشان خير البلد يتوزع على اهلها ... مش يتاكل من الكرسي اللي فوق و الباقي يتوزعوا مرتبات و معاشات ... و لما يطالبوا بزيادات يبقى وحشين و كخه و طماعين و بيوقفوا حال البلد ..... و مش هاممهم مصلحة الوطن !!!
8- أخيرا .............. ربنا يكرم "الوطـــن" و يحققله مصالحه اللي ربنا شايف فيها خير !!
<><><><><><><><><><><><><><><><><><><><><><><><><><><><><><><><><><><><>
نصيحه أخويه اخيره للمجلس "العسكري حاكم مصر" ... كل ساعه و كل ثانيه فيه 1000 تويتايه و 500 ستاتيوس بيقطعوا و بينهشوا في فروة معاليكم من سوء ادارتكم للبلاد و ريحتكم اللي فاحت ....... انا 24 ساعه مبقومش من ادام فيس بوك و تويتر ولا قادر مقطعش في فروتكوا ولا انتقد تصرفاتكم ... بدل ما تقفلوا قهوة البورصه ولا الندوه الثقافيه ولا التكعيبه ... اقفلوا الفيس بوك و تويتر لاني بجد Wanna go to WC .
هناك 3 تعليقات:
عزيزى اسلام الموقر :)
اتفق و اختلف فى نقاط لنبدا بالخلاف و ننتهى بالاتفاق
اختلف معك فى ما ذكرته عن تاخير المحاكمات و عدم اذاعتها لكنى اريد ان اوضح نقطه مهمه نحن لا نتكلم عن محاكمه عاديه شئنا ام ابينا هى محاكمه غير عاديه بكل المقاييس اضرب لك مثل ليوضح وجاهه عدم اذاعه المحاكمات لما انكر الرئيس السابق كل التهم الموجه اليه استنكر الناس هذه فى تناقض واضح غير مفهوم كيف تتوقع من شخص تصفه بالسفاح قاتل شعبه و فاسد بل ذهبت الى اتهامه بالعماله لصالح امريكا و اسرائيل قاتل الرئيس البطل السادات المسئول عن كل شىء فاسد فى البلاد اى انك وضعت تعريف و وصف مطول لشيطان تخفى فى صوره انسان شخص ارتكب كل هذه الجرائم و تستنكر عندما ينكر التهم بل ان البعض ذهب الى اصدار حكم الاعدام- شخصيا انا لا اكترث ان اعدم او اثبتت برائته من كل التهم لا اكترث على الاطلاق - كيف تصدر حكم الاعدام و لا ترضى غيره بديلا على شخص لم تنته محاكمته بعد........ الناس تنادى بتطبيق القانون و العداله على الجميع اقول صراحه انك اذا لم تطبق العداله على اعدى اعدائك فلن تطبقها ابدا عشنا و سنعيش فى ظل نظام قضائى بطىء للغايه الرغبه المسيطره هى رغبه الانتقام و ليست رغبه تطبيق العداله.
كان الاعتراض سابقا على الاصوات المزوره الان على اللجان الانتخابيه لا ارى الا كلام الفاشلين يسوق الاعذار قبل الانتخابات ليبرر فشله ثم يعتلى منبره الاعلامى ليتحدث عن اغتصاب الديموقراطيه الذى حدث من جانب الاخوان و السلفيين ففى النهايه انا اؤمن بان اذا ما احتسبت الاصوات الصحيحه فى كل صندوق بلا تزوير و بلا تلاعب اى كانت النتيجه فيجب على الجميع ان يصمت و يتقبل الهزيمه اذا اتى الاخوان ليحكموا مصر اليس هذا ما اراده الشعب ام ان اراده الشعب غير مهمه بل غير ملزمه الشعب هو القانون و هو الدستور و منه تستمد جميع الشرعيات و الصلاحيات و ليس من عقول المفكرين او النشطاء السياسين او ما شابهم
قانون الضرائب العقاريه فى اصله قانون جيد فى فكرته سىءالتطبيق ان مع تطبيق القانون على من بمتلك العديد من العقارات الغير مسكونه لكنى ضد ان تكون على سكنك الخاص
لا يجروء احد ان يقول عن مصر بلد فقير و لكننا نعانى من سوء التخطيط او للدقه انعدام التخطيط مثلا تخيل انك تريد ان تنقل عدد من الاشخاص الى مكان واحد و تملك سياره مرسيدس و اتوبيس كان العدد عشره ركب تسع المرسيدس و ركب واحد الاتوبيس لانك لم تنسق المواعيد ما بين التسعه فى النهايه ستحصل على مرسيدس مدمره و اتوبيس مهدر 90 من طاقته طبق ما يحدث على الدوله ستجد اننا الدوله الوحيده التى ترصف الطرق ثم تدمرها بعد ذلك لكى تمد خطوط الغاز ثم ترصفه ثم تحفر ثانيه لكى تصلح المجارى ثم بعد ان تتم كل الخدمات تترك الشارع بلا رصف بحجه عدم وجود ميزاينه
اتفق معك فى اهم نقطه و هى قانون الطوارىء انا من الاساس ضد ثقافه الخوف تحت اى مسمى ضد اتخاذ اجراء طارى تحت مسمى حمايه المجتمع من اعلنك واصى على المجتمع يجب ان يفعل القانون دائما و ابدا يجب ان يطبق على الجميع بلا استنثناء يجب على الجميع تقبل فكره ان يد القانون لن تطال بعض الخارجين على القانون و لكن ليس كلهم بل الاوقع و الاقرب الى المنطق ان معظمهم سيلاقى جزاءه انا على استعداد ان اتقبل هذا على ان اتقبل ان يسجن احد ظلما هناك مقوله للشيخ الشعراوى قالها فى حديثه عن تحرى الصدقات و المبالغه فى التحرى قال لان تخطىء فى العطاء خير من ان تصيب فى المنع انا ارى ان اترك مجرم خير من ان احبس برىء اذا كان مجرم سيقع فى جرمه مره ثانيه عندها لن يفلت صراحه انا كنت اريد ان اتكلم عن هذا الموضوع من فتره كبيره لكن حاله القرف التى تعترينى لا تمكنى من فعل اى شىء فى النهايه اتفقنا على ان يقدم الله للوطن ما فيه الخير
مش محتاج اقولك انا مين
عزيزي مازن العسكري :))
هرد على كل نقطه ذكرتها ف تعليقك سواء متفقين او مختلفين و اسمحلي انتهى بالاختلاف لاني هتفق معاك فيه :))
1- متفق معاك ف حالة القرف اللي كلنا فيها و مقدر اقتناعك بمدى اهمية قانون الطواريء و قانون العقارات و اهمية و ضرورة و مراعاة التنفيذ و التطبيق العادل و السليم .... و استشهادك بما قد ذكره الشيخ الشعراوي رحمه الله من حديث يدل على مدى توافقى معك فيما ذكرت بخصوص الطواريء و العشوائيه في بلدنا في تنفيذ القوانين .
2- انا ذكرت ان مصر مش بلد فقير و ذكرت امثله كتير لمصادر الدخل الكثيره اللي ف بلدنا .... اتفق معاك في سوء التخطيط و الاداره و اتفق اكتر في لفظ انعدام التخطيط و الاداره ........ لكن الفرق هنا مش موضوع تخطيط و اداره ... فيه واحد اعمى و فيه واحد عامل اعمى ... هو ده الفرق ... فيه واحد سيء ف الاداره و التخطيط ... و واحد عامل عبيط و بيسوء اكتر و اكتر مع انه عارف انه غلط و هيودي الدنيا ف داهيه بس بيعامى و عامل جاهل ... و ده حالنا دلوقتى ... النفوذ زايل و اللي بيلاقيله كرسي مش بيمسك فيه اد ما بيقولك الحق اكسب من وراه بسرعه قبل ما اطير !!
3- اخيرا .. موضوع المحاكمات و التأخير ..... انا متفق معاك ان مبارك واخد حكم من قبل ما يتحاكم ... و ان العدل لازم ياخد مجراه ... و اننا في بلد القانون فيه و العدل فيها عشان يبقى عدل بياخد سنين و سنين ... لكن انا اعتراضي او سبب تخوفي و اثارتي لنقطه زي دي انك بتحاكم نظام قوي مازال موجود مازال يعبث بكل شيء مازال يخفي ادلة ادانته مازال يتحكم بكل كبير قبل صغيره في شعب البلد الغلبانه دي ... مازن فيلم الباشا تلميذ كان في احراز القضيه "تفتكر الجلسه الجايه هيشغلولهم فيلم ابيح؟" ... معركة الجمل مجابوش ليها ولا فيديو فيه حصان واحد ولا جمل و فيديوهات 28 يناير مفيهاش ولا مجزره من اللي حصلوا ولا حاجه تدين الشرطه و الداخليه طلع مفيهاش قناصه و هيطلع الشعب هو اللي تأمر على نفسه !!
انت في بلد فيها العبث مباح في كل شيء ... حتى لو في حبل مشنقه ممكن المتهم يلفوا حوالين رقبة عشماوي نفسه !!!
شكــرا مـــازن و عارف ان انت :))
و ربنا يصلح الأحوال و يقدم ما فيه الخير للبلد .
اسلام جمال
اسلام ما اكيد اللى عامل اعمى ده ركب تسعه فى المرسيدس و الواحد فى الاتوبيس اى بلد فيها فساد اللى يقولك احنا معندناش فساد اعرف انه اكبر فاسد فى بلدهم بس المشكله انن اصلا معندناش نظام يمنعك انك تصبح فاسد انا كنت بتكلم عن الفكره ديه تحديدا فى نوت ده اللينك بتاعه http://fakerm3aya.blogspot.com/2011/07/blog-post.html
شوفه كده و رد عليا هناك
إرسال تعليق